Nýir eigendur að Samey

Gengið hefur verið frá kaupum á öllu hlutafé í Samey sjálfvirknimiðstöð. Kaupandi er félagið Samey Holding ehf. sem er í eigu Bjarna Ármannssonar, Kristjáns Karls Aðalsteinssonar og Vygandas Srebalius er kemur fram í tilkynningu. 

Arion banki og LEX lögmannsstofa önnuðust ráðgjöf fyrir kaupendur og ráðgjafi seljenda var Deloitte á Íslandi.

Samey var stofnað árið 1989 og vinnur að aukinni sjálfvirknivæðingu íslensks iðnaðar með þróun og notkun þjarka. 

„Á sjötta hundrað verksmiðjur og vinnslur í 25 löndum starfa í dag með kerfum frá Samey. Árangur undanfarinna ára hefur verið sérlega marktækur og hefur Samey afhent mörg stór kerfi fyrir laxeldi á Íslandi, Færeyjum og í Noregi. Einnig eru lausnir frá Samey víða í fiskvinnslum landsins og þar má t.d. nefna í nýju hátækni fiskvinnsluhúsi Samherja á Dalvík og Brim í Reykjavík,“ segir í tilkynningu. 

Kristján mun ásamt Haraldi Þorkelssyni, framkvæmdastjóra félagsins og syni stofnandans, mynda framkvæmdastjórn félagsins.

• Blogga um frétt