„Þetta er helvítis rassgat“

Ísfisktogari Vinnslustöðvarinnar í Vestmannaeyjum Drangavík VE-80 varð vélarvana á mánudaginn og var dregin í land af Brynjólfi VE-3.

„Það varð tjón á vélinni. Þannig að þetta er sennilega talsvert mikið tjón,“ segir Sigurgeir Brynjar Kristgeirsson, framkvæmdastjóri Vinnslustöðvarinnar í Vestmannaeyjum í samtali við 200 mílur. 

Unnið hefur verið að því að rífa vél bátsins í sundur til að greina bilunina og umfang tjónsins síðan skipið var dregið í land en Sigurgeir Brynjar segir stöðuna ekki líta vel út sem stendur. 

„Véin hefur skemmst talsvert, það liggur alveg fyrir. Þetta eru alltaf einhverjar vikur í viðgerð,“ segir hann. 

„Auðvitað er það alltaf helvítis tjón þegar vél bilar og ef það er í vondum aðstæðum þá er það hræðilegt,“ segir Sigurgeir Brynjar en bætir við að Drangavíkin var austan við Vestmannaeyjar þegar bilunin kom upp, sem betur fer í blíðu. 

„Það fór allt vel, engin hætta hjá áhöfninni og engin slysahætta en þetta er helvítis rassgat,“ segir Sigurgeir Brynjar. 

Drangavík VE-80 frá Vestmannaeyjum siglir inn í Reykjavíkurhöfn. mbl.is/Ómar

• Blogga um frétt