Rannsóknarskip Hafrannsóknastofnunar Íslands, Árni Friðriksson, kom í höfn í Hafnarfirði í fyrradag eftir að hafa tekið þátt í árlegum alþjóðlegum uppsjávarvistkerfisleiðangri í Norðurhöfum að sumarlagi, sem kallast upp á ensku IESSNS, International Ecosystem Summer Survey in the Nordic Seas.

Fyrstu niðurstöður leiðangursins benda til þess að meira magn sé af makríl í íslenskri fiskveiðilögsögu í ár heldur en í fyrrasumar.

Þá benda niðurstöðurnar til að makríll hafi áberandi meiri útbreiðslu fyrir austan landið heldur en sumarið 2021 en þéttleikinn sé lítill. Með öðrum orðum er makríl víða að finna en hann er dreifður.

Þetta kemur heim og saman við frásagnir og tilfinningu sjómanna og útgerðarmanna sem 200 mílur hafa rætt við frá því haldið var af stað í makrílveiðar í sumar.

Enn veiða skip í Smugunni þessi dægrin og dæla á milli skipa til þess að lágmarka tíma fram að löndun.

Vænn í lögsögunni

Stefán Friðriksson, framkvæmdastjóri Ísfélags Vestmannaeyja, segir í samtali við 200 mílur að veiði sé enn svipuð, það er hæg.

„Við reyndum í síðustu viku að veiða í íslensku lögsögunni með frekar litlum árangri. Það var blandað af síld og makríl en fiskurinn var ansi góður. Það var lítið af honum hér, en hann var stór og góður. Í Smugunni er eitthvað meira af honum en hann er smár eins og er og lélegur,“ segir Stefán.

Stefán segir gott samkomulag ríkja um uppgjör gagnvart sjómönnum þegar dælt er á milli skipa. „Aflaverðmætum er jafnt dreift á milli skipa. Síðan er hlutur reiknaður út frá fjölda háseta um borð í hverju skipi.“

Tengdar fréttir

Makrílveiðar

130 þúsund tonna upphafskvóti í makríl

• Fá að færa 25% makrílkvótans á næsta ár
• Eining um heildarkvóta en ekki skiptingu
• Leggur til 22% lækkun á makrílveiðum
• Útbreiðsla makríls í íslenskri landhelgi ein sú minnsta

» Fleiri tengdar fréttir