Lúxussnekkja og fyrrum ísbrjótur í Eyjafirði

Lúxussnekkjan Ragnar liggur nú fyrir akkeri inni á Eyjafirði. 

Skipið er smíðað árið 2012 hjá Niestern Sander, Royal Bv. í Hollandi og hét upphaflega Sanaborg og var þá ísbrjótur. Ragnar er 68,2 metrar að lengd og 14 metrar á breidd.

Ísbrjóturinn hafði legið ónotaður um hríð þegar að núverandi eigandi hans eignaðist hann 2017 og réðst í að breyta honum í lúxussnekkju. Lauk því verki ekki fyrr en 25. janúar á þessu ári.

Ragnar lónar í Eyjafirði. mbl.is/Þorgeir Baldursson

Útlitið skýrist af áhuga eigandans á bardögum á miðöldum og vopnum þess tíma. Á yfirbyggingin að svipa til hjálms líkt og menn báru í bardögum þess tíma.

Sérstaða Ragnars er að hann er með ísklassa vottun. Hann á að geta haldið fjögurra mílna ferð í fimmtíu sentímetra þykkum ís og athafnað sig í kulda allt niður í -35°. 

Um borð er pláss fyrir sextán gesti sem geta gist í átta klefum, þar af eru tvær stórar svítur. Einnig er þarna að finna sundlaug, nuddpott, líkmsræktarsal og gufubað svo eitthvað sé nefnt.

Skipið er sömuleiðis búið fyrir alls konar dót; til dæmis þyrlu, könnunarkafbát, rib-bát, tvær sæþotur og Ripsaw EV2 lúxus-skriðdreka, sem er auðvitað bráðnauðsynlegt að hafa við höndina þegar þarf að fara um torveld svæði á snekkju.

Það var breska fyrirtækið RWD sem hannaði breytingarnar og hollenska skipasmíðastöðin Icon Yachts sá um smíðavinnuna. Ragnar er skráður í Valetta á Möltu.

• Blogga um frétt