Áætlað er að rannsóknaskipin Árni Friðriksson og Bjarni Sæmundsson sigli um 7.000 sjómílur í haustleiðangri Hafrannsóknastofnunar til rannsóknar á loðnu sem hófst í gær. Árni Friðriksson mun vera 19 daga á sjó en Bjarni Sæmundsson 17 daga.

Fram kemur í færslu á vef Hafrannsóknastofnunar að „strax að loknum leiðangri og úrvinnslu gagna verður gefin út ný ráðgjöf um veiðar á loðnu fiskveiðiárið 2021-2022 en jafnframt verður um mánaðamótin nóvember-desember gefin ráðgjöf um upphafsaflamark fyrir vertíðina 2022-2023“.

Áætlaðar leiðarlínur rannsóknaskipanna Bjarna Sæmundssonar (bláar línur) og Árna Friðrikssonar (grænar línur) við loðnurannsóknir næstu þrjár vikur. Búast má við að breyta þurfi leiðarlínum og yfirferð til að aðlagast aðstæðum t.d. vegna hafíss, veðurs og fleira. Mynd/Hafrannsóknastofnun

Um er að ræða samstarfsverkefni Íslands og Grænlands og fer Bjarni Sæmundsson fyrir hönd Hafrannsóknastofnunar en Grænlendingar hafa tekið Árna Friðriksson á leigu.

„Meginmarkmiðið leiðangursins er mæling á stærð veiðistofns (kynþroska loðna sem ætla má að komi til hrygningar 2022) og mæling á magni ungloðnu (eins árs ókynþroska loðna sem verður uppistaðan í veiðistofni 2022-2023). Auk þess verða stundaðar umhverfis- og vistfræðirannsóknir í leiðangrinum sem snúa meðal annars að því að skoða tengsl umhverfisþátta og hafstrauma við útbreiðslu og göngur loðnu ásamt því sem útbreiðsla og mergð svifdýra verður skoðuð m.a. með tilliti til fæðuöflunar loðnu,“ segir í færslunni.

Þá er rannsóknasvæðið í vestanverðu Íslandshafi, Grænlandssundi og suðvestur með landgrunni Grænlands um 100 mílur vestur af Angmagssalik. Einnig verður farið norðaustur með grænlenska landgrunninu norður að Shannon-eyju sem er við 75. breiddargráðu.

Hægt verður að fylgjast með staðsetningu og ferli skipanna í beinni.

Tengdar fréttir

Hafrannsóknastofnun

Þorskar undir meðalþyngd fyrri ára

• Jónbjörn setti nafn sitt á nýja tegund
• Fjárfestu í nýjum rannsóknabúnaði
• Auglýsa Bjarna Sæmundsson til sölu
• Vel heppnað loðnueldi

» Fleiri tengdar fréttir

Loðnuveiðar

Töf á mælingu vegna viðgerðar

• Lítið sást til loðnunnar
• Ekkert hefur sést til loðnunnar
• Enga stund að éta 10 milljónir loðna
• Kanna útbreiðslu loðnunnar í desember

» Fleiri tengdar fréttir

• Blogga um frétt