Gríðarleg fjölgun námsmanna á Ísafirði

Aldrei hafa fleiri nemendur verið innritaðir í nám á meistarastigi við Háskólasetur Vestfjarða. Alls hófu 43 nemendur nám í tveimur námsleiðum setursins í haust. Þá hefur fjöldi innritaðra nemenda tvöfaldast frá því að ný námsleið, Sjávarbyggðafræði, hóf göngu sína við setrið haustið 2019.

„Þessi fjölgun er í samræmi við þau markmið sem Háskólasetrið setti sér með nýju námsleiðinni en fyrir var námsleiðin Haf- og strandsvæðastjórnun sem hóf göngu sína haustið 2008. Báðar námsleiðirnar eru kenndar í samstarfi við Háskólann á Akureyri,“ segir í tilkynningu frá háskólasetrinu.

2,7% íbúa Ísafjarðar

Fram kemur að báðar námsleiðirnar eru staðnám og hefur því orðið tölvuverð fjölgun íbúa á Ísafirði. „Auk nemenda á fyrsta ári eru um tveir þriðju hluti annars árs nemenda einnig búsettir á Ísafirði í vetur eða u.þ.b. 20 manns. Þar að auki bætast við 10 nemendur í annarnámi frá samstarfsskólanum SIT í Vermont í Bandaríkjunum. Heildarfjöldi háskólanema með búsetu á Ísafirði er því kominn vel yfir 70 talsins,“ segir í tilkynningunni. Vakin er athygli á að í 2.700 manna byggð er um að ræða um 2,7% íbúa.

Bundnar eru miklar vonir við að þessi þróun verði til þess að fleiri kjósi fasta búsetu á Vestfjörðum og sýnir gögn að á tímabilinu 2008 til 2018 eru 12% útskrifaðra nemenda búsettir á Vestfjörðum tveimur árum eftir útskrift.

12% útskrifaðra nemenda eru með fasta búsetu á Vestfjörðum tvö ár eftir útskrift. Ljósmynd/Háskólasetur Vestfjarða

Nýtir áður ófullnýtta heimavist

„Þessi auknu umsvif hafa víðtæk áhrif út í samfélagið og þýða að Háskólasetrið sækir í auknum mæli þjónustu til fyrirtækja og stofnana á Vestfjörðum. Til dæmis hefur fjölgunin það í för með sér að Háskólasetrið leigir sal undir kennslu í Edinborgarhúsinu nú á haustönn og nýtir áður ófullnýtta heimavist Menntaskólans fyrir nemendur í annarnámi frá SIT,“ segir í tilkynningu Háskólaseturs Vestfjarða.

„Háskólasetrið hefur náð góðri stærð og með tilkomu námsleiðarinnar í sjávarbyggðafræði er að teiknast upp framtíðarmynd,“ segir Peter Weiss forstöðumaður Háskólaseturs. „Þannig verða á hverjum tíma innritaðir upp undir 100 nemendur á vegum Háskólasetur Vestfjarða í HA og þar af 70-75 búsettir á Ísafirði, auk starfsmanna, kennara og rannsóknarmanna. Þetta er góð stærð og hér hefur myndast „krítískur massi“ sem þarf að efla og vinna út frá á næstu árum.“

Frétt af mbl.is

Nám í sjávarbyggðafræði hefst í haust

• Blogga um frétt