Verndarsjóður villtra laxastofna hefur birt myndir á vef sínum sem sýna dauða eldislaxa fljótandi ofan á eldiskvíum í sjó á Reyðarfirði. 

Veiga Grétarsdóttir kajakræðari tók myndirnar daganna 10. til 15. september eins og kemur fram í tilkynningu frá samtökunum. 

Í tilkynningunni segir að fiskurinn á myndunum sé rotnandi, innan um lifandi fisk sem ætlaður er til manneldis. 

Fylgdist með úr fjarska

„Ég fylgdist með úr fjarska á föstudeginum og sá starfsmenn eldisfyrirtækisins dæla dauðum laxi úr kvínni í einn og hálfan tíma og eins og sést á þessum myndum þá er þetta hinn nöturlegi raunveruleiki. Eftir helgina hafði þetta hinsvegar versnað enn meira.

Ég skil ekki að nokkur maður hafi lyst á að leggja sér eldisfisk úr þessum kvíum til munns eða styðja svona framleiðslu. Þegar fiskurinn drepst þarna er búið að reyna ýmislegt en þarna er samt mikið magn af haus- og roðlausum úldnandi fiski og allan tíman safnast upp mengun í firðinum af þessu,“ er haft eftir Veigu Grétarsdóttur í tilkynningu.

Veiga segir ennfremur að á þriðjudeginum hafi þörungablómi einnig farið vaxandi en ljóst má vera að laxadauðinn mun aukast enn frekar vegna þörunganna.