Ný reglugerð um safnskip hefur tekið gildi

Ný reglugerð um safnskip, sem Sigurður Ingi Jóhannsson, samgöngu- og sveitarstjórnarráðherra, undirritaði, hefur tekið gildi.

Með reglugerðinni eru settar sérreglur um skip, sem eru 50 ára og eldri og rekin í menningarlegum tilgangi. Dæmi um slík safnskip er varðskipið Óðinn sem liggur við bryggju við Grandagarð og er hluti af Sjóminjasafninu í Reykjavík.

Í tilkynningu frá Stjórnarráðinu kemur fram að reglugerðin hafi verið sett með vísan í skipalög (nr. 66/2001) sem heimilar ráðherra að undanþiggja safnskip frá tilteknum kröfum laga og reglna með vísan til menningarlegs gildis þess.

Í reglugerðinni er heimilað að safnskip sé búið líkt og lög mæltu þegar skipið var smíðað og tekið til rekstrar með vissum takmörkunum, s.s. varðandi björgunarbúnað, sem uppfylla þarf nútímakröfur. Þá kemur einnig fram í tilkynningu að reglugerðin hafi verið undirbúin í samvinnu við Samgöngustofu sem mun halda utan um skráningu safnskipa.

• Blogga um frétt