Gamli Herjólfur fauk í óveðrinu

Gamli Herjólfur losnaði frá bryggju í Vestmannaeyjahöfn í hvassviðrinu dag en mikil suðvestanátt er nú á svæðinu sem og á höfuðborgarsvæðinu.

„Það er brjáluð suðvestanátt hérna,“ segir Dóra Björk Gunnarsdóttir, hafnarstjóri Vestmannaeyjahafnar.

Starfsmenn náðu skömmu síðar að ræsa vélarnar í Herjólfi og var Lóðsinn fenginn til aðstoðar við að ýta skipinu aftur að höfninni, svo hægt væri að binda það aftur við bryggju, að sögn Dóru.

Lóðsinn var fenginn til að aðstoða við að draga gamla Herjólf að landi. mbl.is/Óskar Pétur Friðriksson

Appelsínugul viðvörun víða

Appelsínugul viðvörun er nú í gildi vegna veðurs á Suðurlandi, Austurlandi að Glettingi, Suðausturlandi og miðhálendinu en gul viðvörun er í gildi á Vestfjörðum, Ströndum og Norðurlandi vestra, Norðurlandi eystra, Austurlandi að Glettingi og Austfjörðum. 

Á höfuðborgarsvæðinu hefur vindurinn farið í 17 metra á sekúndu og 19 metra á sekúndu í Vestmannaeyjum.

Vel gekk að festa skipið. mbl.is/Óskar Pétur Friðriksson

• Blogga um frétt