Frumniðurstöður rannsóknaleiðangurs hafrannsóknaskipanna Árna Friðrikssonar og Bjarna Sæmundssonar, á loðnustofninum við Ísland, gefa til kynna að þær væntingar sem gerðar voru um veiðar komandi vertíðar muni standast.

Frá þessu greinir Hafrannsóknastofnun í tilkynningu. Þar segir að stofnunin muni á föstudag veita ráð um aflamark loðnu fyrir komandi vertíð.

Leiðangri skipanna lauk í lok síðustu viku og unnið er að úrvinnslu gagna og útreikningum.

Upphafsráðgjöf varfærin

Upphafsráðgjöf um veiðar úr loðnustofninum fyrir loðnuvertíðina 2021/2022 var veitt í desember 2020 og var sú ráðgjöf um veiðar á allt að 400 þúsund tonnum. Sú ráðgjöf var veitt á grundvelli gildandi aflareglu og byggði á mælingum á ókynþroska ungloðnu í september 2020. Þar sem mikil óvissa er um tengsl ungloðnu og veiðistofns ári síðar var um að ræða varfærna ráðgjöf.

Fyrstu niðurstöður nú benda þó til þess að væntingarnar muni standast, eins og áður sagði.

Því er fyrirséð að Hafrannsóknastofnun muni leggja til aukið aflamark þegar útreikningum á stærð veiðistofnsins verður að fullu lokið.

Tengdar fréttir

Loðnuveiðar

Loðnumælingar gefa ekki ástæðu til bjartsýni

• Sást til loðnu norður af Vestfjörðum
• Loðnumæling tafðist er Árni leitaði í var
• Fyrstu skipin til loðnumælinga
• „Við urðum örlítið varir við loðnu“

» Fleiri tengdar fréttir

• Blogga um frétt