Þyrla sótti skipverja eftir að skúta strandaði

Fjórir skipverjar á skútu sem strandaði við Æðey í Ísafjarðardjúpi voru hífðir um borð í þyrlu Landhelgisgæslunnar um klukkan tvö í nótt.

Stjórnstöð Landhelgisgæslunnar barst tilkynning um strandið laust eftir miðnætti. Áhöfnin á TF-GRO, þyrlu Landhelgisgæslunnar, var þegar í stað kölluð út sem og sjóbjörgunarsveitir Slysavarnafélagsins Landsbjargar á Vestfjörðum, að því er segir í tilkynningu.

Stjórnstöð Gæslunnar óskaði sömuleiðis eftir því að áhöfn rannsóknarskipsins Bjarna Sæmundssonar héldi á svæðið en það var statt í Ísafjarðardjúpi.

Enginn leki kom að skútunni við strandið, veðrið var ekki gott en þó fór ágætlega um skipverjana fjóra á meðan beðið var eftir aðstoð.

Rannsóknarskipið Bjarni Sæmundsson og björgunarskipið Kobbi Láka voru fyrst á vettvang og laust fyrir klukkan tvö kom TF-GRO, þyrla Landhelgisgæslunnar, á svæðið. Áhöfn hennar hófst þegar handa við að hífa mennina fjóra frá borði. Hífingarnar gengu vel en voru krefjandi vegna masturs skútunnar.

Klukkan 2:15 voru allir skipverjarnir, þrír Englendingar og einn Íslendingur, komnir um borð í TF-GRO. Flogið var með þá til Ísafjarðar til aðhlynningar. Aðstæður á vettvangi verða kannaðar við birtingu og flóð.

• Blogga um frétt