Ætla að minnka olíunotkun um 160 tonn

Eimskip hefur undirritað samning við norska fyrirtækið Blueday Technology AS um hönnun og smíði á búnaði til að landtengja skip við rafmagn við Sundahöfn, en Efla mun hafa umsjón með verkinu, að því er fram kemur í tilkynningu á vef Eimskipa. Þar segir að einnig hafi verið samið við kínverska fyrirtækið SaierNico um breytingu á rafstýringum um borð í Brúarfossi og Dettifossi.

Með tilkomu landtengingarinnar mun hávaðasöm ljósavél sem knýr rafmagn og nauðsynlegan búnað um borð heyra sögunni til og er áætlað að hægt verði að minnka olíunotkun um 160 tonn árlega.

Áfangi í orkuskiptum

„Um er að ræða mikilvægan áfanga í orkuskiptum við Sundahöfn en viljayfirlýsing var undirrituð á síðasta ári á milli umhverfis- og auðlindaráðuneytisins, Faxaflóahafna, Veitna, Reykjavíkurborgar og Eimskips um uppbyggingu og rekstur landtenginga fyrir skip í Sundahöfn,“ segir í tilkynningunni.

Vert er að minnast á að kranar Eimskips hafa þegar verið rafvæddir og kveðst fyrirtækið stefna að því að minnka losun gróðurhúsalofttegunda í starfsemi sinni um 40% fyrir 2030.