Nánast samfelld vinnsla hefur verið í fiskiðjuveri Síldarvinnslunnar í Neskaupstað frá því í júní og hefur starfsfólkið unnið á þrískiptum vöktum. Það sem af er ári hafa verið unnin 70 þúsund tonn í vinnslunni og er enn verið að landa afla, um er að ræða algjört metár.

Fyrra met var sett 2012 þegar fiskiðjuverið tók við 63 þúsund tonnum til vinnslu.

Frá júní hefur verið landað rúmlega 60 þúsund tonnum af makríl og síld en fyrr á árinu var landað um 10 þúsund tonnum af loðnu. Í dag landar Börkur NK 1.360 tonnum af norsk-íslenskri síld, en stutt er frá því að 1.100 tonnum var landað úr Bjarna Ólafssyni AK.

Aldrei hefur meiri afli verið unnin í fiskiðjuveri Síldarvinnslunnar á Neskaupstað. Ljósmynd/Síldarvinnslan/Þorgeir

„Það hefur í reyndinni allt gengið eins og í sögu. Við höfum frábært starfsfólk og síðan hafa veiðarnar gengið vel. Veiðarnar eru vel skipulagðar þannig að við erum ávallt að vinna ferskan og góðan fisk,“ segir Jón Gunnar Sigurjónsson, yfirverkstjóri í fiskiðjuverinu, í færslu á vef Síldarvinnslunnar.

„Nú er einungis einn farmur af norsk-íslenskri síld eftir að koma og síðan verður hafist handa við að veiða og vinna íslenska sumargotssíld. Síðan er risaloðnuvertíð framundan og þá þurfa hjólin að snúast hratt. Oft er þó áta í loðnunni á þessum árstíma og því mun loðnufrysting kannski ekki hefjast fyrr en eftir áramótin. Í okkar iðnaði skiptir öllu máli að veiðarnar og vinnslan séu skipulögð heildstætt. Þegar það er gert næst góður árangur eins og við erum að upplifa núna,“ segir Jón Gunnar.

Tengdar fréttir

Síldarvinnslan

Jólasíld ársins í fötur

• Samherji tekur Birting á leigu
• Fjölnir til Noregs
• Kaup Síldarvinnslunnar ganga til baka
• Sjóvá og Síldarvinnslan áfram í samstarfi

» Fleiri tengdar fréttir

• Blogga um frétt