83 hvali hefur rekið á land í ár

Líklegt er að langreyður sem rak á fjörur í Skötubót austan við Þorlákshöfn í vikunni verði urðuð, en ákvörðun um það er á forræði Umhverfisstofnunar og sveitarfélagsins.

Það sem af er ári hafa 83 hvalir fundist reknir á land í 34 atburðum. Mest hefur verið af marsvínum eða grindhvölum, en þarna er líka að finna svínhveli eins og andarnefju og skugganefju og af stórhvölum má nefna búrhvali og langreyðar.

Af síðastnefndu tegundinni hafa fundist þrír tarfar í ár. Þá er meðtalinn hvalur sem trúlega hefur drepist er flutningaskip sigldi á hann og var komið með á stefni skipsins til Hafnarfjarðar í sumar. Sverrir Daníel Halldórsson, líffræðingur á Hafrannsóknastofnun, rannsakaði langreyðina við Þorlákshöfn í gær og segir að dýrið sé tæplega 19 metra tarfur, horaður að sjá.