Eimingartækin 30 tonn

Unnið er hörðum höndum að koma upp nýjum eimingartækjum í húsnæði Loðnuvinnslunnar á Fáskrúðsfirði. Þeim er ekki ætlað að framleiða áfengi eins og sumir lesendur kynnu að halda heldur er tækið mikilvægur þáttur í framleiðslu á fiskimjöli.

Tækin eru ekkert smáræði og vega um 30 tonn. Þau eru framleidd á Íslandi af Héðni og er hlutverk þeirra að eima upp soðið af fiskinum þannig að mjöl standi eftir, samkvæmt lýsingu í færslu á vef Loðnuvinnslunnar.

Tækin eru stór. Ljósmynd/Loðnuvinnslan

Búist er við því að afköst aukist um 100% þegar eimingartækin verða tekin í notkun. Þá munu tækin ganga á varma sem fæst frá þurrkurum fiskimjölverksmiðjunnar. „Þetta er mjög gott, því að eimingartækin gömlu voru orðin hálfgerður flöskuháls, það er búið að stækka þurrkarana og það er nýr sjóðari og þessi nýju tæki munu ganga miklu betur við þann búnað allan,“ segir Magnús Ásgrímsson, verksmiðjustjóri Loðnuvinnslunnar, í færslunni.

Mikilvægt er að auka afköst um þessar mundir þar sem stefnir í sögulega loðnuvertíð.

Efri hluti eimingartækisins stendur upp úr þaki bræðslunnar og yfir það kemur síðan turn. Búist er við því að það muni taka nokkurn tíma að klára framkvæmdirnar og að þeim verði lokið upp úr áramótum.

Framkvæmdum lýkur upp úr áramótum. Ljósmynd/Loðnuvinnslan

• Blogga um frétt