Brim skaust upp fyrir kvótaþakið

Úthlutun aflaheimilda í loðnu upp á um 627 þúsund tonn raskaði hlutföllum og hafði það í för með sér að leyfilegt heildarverðmæti aflahlutdeilda allra tegunda hjá Brimi hf. fer í 13,2%. Leyfilegt hámark aflahlutdeilda í heild í eigu hverrar útgerðar er 12% af úthlutuðum þorskígildum. Guðmundur Kristjánsson, forstjóri Brims, segir að fyrirtækið hafi nú sex mánuði til að bregðast við og selja frá sér heimildir.

Þetta kemur fram í Morgunblaðinu í dag.

„Þessi niðurstaða Fiskistofu sýnir í hnotskurn hversu rangur mælikvarði þorskígildisstuðullinn er,“ segir Guðmundur. „Það sem gerist hjá Brimi er að loðnan fær mjög háan stuðul á þessu fiskveiðiári þar sem í vetur voru tiltölulega fá tonn veidd, en seld á háu verði eftir tvö loðnulaus ár á undan. Þetta gerir það að verkum að við förum yfir hámarkið.“ Hann segir að verðmæti loðnukvótans í þorskígildum á þessu fiskveiðiári sé 30% meira heldur en allra aflaheimilda í þorski. Slíkt standist ekki.

Frekar þak í hverri tegund

„Ég myndi vilja að þak í hverri fisktegund myndi ráða hámarkinu. Það er einfalt og gagnsætt kerfi, auðvelt að fylgjast með og kostar ekki flókið eftirlitskerfi né mikla peninga,“ segir Guðmundur. Hann segir að Íslendingar séu eina þjóðin sem noti þá aðferðafræði að miða við þorskígildisstuðla og ekki sé nokkur leið að útskýra fyrir útlendingum hvernig þakið sé fundið út. Í loðnu er miðað við að aflaheimildir einstakra útgerða séu að hámarki 20% og er Brim með 18% heimilda í tegundinni.