Enginn skipverjanna mikið veikur

Ólafur Bjarni Haraldsson stýrimaður á Málmey SK-1 segir stöðuna á Málmey fína þrátt fyrir að grunur sé um Covid-19 smit hjá skipverjum. Skipið sé á leið á Sauðárkrók og verður áhöfnin í heild sinni skimuð við komuna.

„Menn fóru bara að finna fyrir smá flensueinkennum og þá voru bara tekin hraðpróf. Þar greindist einn jákvæður og þá var ákveðið að allir tækju hraðpróf og að málum skyldi hagað eins og það væri staðfest smit, þrátt fyrir að það sé bara grunur eins og er,“ segir Ólafur í samtali við mbl.is.

Enginn mikið veikur

Hann segir líðan skipverja fína og að enginn sé mikið veikur. Þeir sem fengu jákvæða niðurstöðu úr hraðprófum séu bara inni í sínum klefum og þeim færður matur þangað.

Helsti vandinn sé þá að töluvert mikið þarf að þrífa og sótthreinsa enda hafi skipverjar verið í samneyti við þá sem grunur er um að séu smitaðir undanfarna tvo daga. En Málmey fór út á sjó á miðvikudaginn og var stefnan sú að snúa ekki aftur til lands fyrr en að viku liðinni.

Frétt af mbl.is

Fjórir skipverjar á Málmey smitaðir

• Blogga um frétt