Myndarleg aukning síldarafla

Afli sem íslenski skipaflotinn kom með að landi í október nam 119 þúsund tonnum sem er 38% meiri afli en í sama mánuði í fyrra. Aukninguna má rekja til meiri uppsjávarafla en hann jókst um 88% á sama tíma og botnfiskafli dróst saman um 15%.

Þetta kemur fram í tölum sem birtar eru á vef Hagstofu Íslands. Þar segir að verðmæti aflans sem landaður var í október, metið á föstu verðlagi, lækkar um 1,8% í samanburði við október í fyrra.

Frétt af mbl.is

„Þetta er alger veisla“

Aukningin í lönduðum síldarafla nemur tæplega 30 þúsund tonnum og var í heild landað 65.951 tonni í október. Þá nam kolmunnaaflinn 17.649 tonnum sem er 109% aukning frá sama mánuði í fyrra.

Alls veiddust 18.271 tonn af þorski sem er 23% minna en í október í fyrra og 4.911 tonn af ýsu sem er 17% minna en í sama mánuði 2020. Vel hefur gengið að ná ufsanum og var í október landað 5.908 tonnum sem er 40% meira en í október á síðasta ári.

Á tólf mánaða tímabilinu frá nóvember 2020 til október 2021 var heildaraflinn rúm 1.072 þúsund tonn sem er 6% aukning frá sama tímabili ári áður. Á tímabilinu var landað í íslenskum höfnum tæp 471 þúsund tonn af botnfisktegundum og rúm 570 þúsund tonn af uppsjávarfiski.

Frétt af mbl.is

„Sama fallega síldin en heldur smærri“

• Blogga um frétt