Gullhólmi dreginn til hafnar vegna elds

Eldur kom upp í fiskiskipinu Gullhólma SH og var það dregið í land á Rifi vegna þess rétt í þessu. Engin slys urðu á fólki. Þetta staðfestir Svanur Tómasson, slökkviliðsstjóri Snæfellsbæjar, í samtali við mbl.is.

Inntur eftir því segir hann það ekki liggja fyrir hver upptök eldsins voru.

„Fljótt á litið held ég að þetta hafi bara verið ein lítil sprenging en við sjáum ekkert eins og staðan er núna.“

Slökkviliðið að störfum á vettvangi. mbl.is/Alfons

Svanur telur fjóra til fimm menn hafa verið um borð í skipinu og segir hann áhöfnina hafa brugðist hárrétt við aðstæðum.

„Þeir settu slökkvikerfið í gang og lokuðu öllu. Þeir gerðu alveg hárréttar ráðstafanir. Þeir voru svo dregnir í land og við sendum reykkafara niður til að kanna málið.“

Þá segir hann vel hafa gengið að draga skipið í höfn og koma áhöfnininni í öruggt skjól.

„Þetta er allavega búið. Þetta fór allt vel. Björgin dró hann í land og allt mjög flott.“

• Blogga um frétt