Skerða heimildir en veiða tæp milljón tonn

Rússnesk yfirvöld hafa ákveðið að skerða veiðiheimildir í kyrrahafsufsa í Okotskhafi fyrir árið 2022 um 3,5%. Þrátt fyrir skerðinguna stefnir í veglegar veiðar enda gert ráð fyrir að rússnesk skip veiði um 956 þúsund tonn á næsta ári, að því er fram kemur í umfjöllun IntraFish.

Á þessu ári og í fyrra ráðlögðu vísindamenn veiðar yfir milljón tonn en nú gera vísindamenn ráð fyrir að næstu árin munu ráðlögð hámarksveiði lækka.

Rússar hafa átt í vandræðum með að koma ufsanum í verð eftir að hafnir í Kína lokuðu fyrri flutning afurða á kínverska markaðinn, en 60% af sjávarafurðum Rússa eru seldar þangað. Fram kom í umfjöllun Seafood Source í sumar að reynt var auka sölu í Tælandi og í Víetnam vegna ástandsins.

• Blogga um frétt