Á leið til Fáskrúðsfjarðar með 800 tonn af síld

Hoffell SU-80 er nú statt skammt frá Dyrhólaey á leið sinni frá Jökuldjúpi til heimahafnar á Fáskrúðsfirði. Um borð eru um 800 tonn af síld. Skipið verður líklega komið til hafnar aðra nótt en af miðunum til heimahafnar eru um 400 sjómílur.

Fram kemur á vef Loðnuvinnslunnar, sem gerir skipið út, að veiðin hafi gengið vel eftir að brælan gekk niður í gær og fékkst aflinn á einum sólarhring.

Síldin sem Hoffellið kemur með fer öll í söltun og snýr skipið til síldarveiða á ný að löndun lokinni.

Afli á síldarvertíðinni hefur verið með ágætum í október en veður hefur truflað veiðar hjá mörgum í nóvember.

Frétt af mbl.is

Myndarleg aukning síldarafla

• Blogga um frétt