323 milljóna túr hjá Tómasi Þorvaldssyni

Tómas Þorvaldsson GK-10, frystitogari Þorbjarnar hf, kom til hafnar í Grindavík í morgun með mesta afla sem skipið hefur náð í frá því að útgerðin hóf að gera það út.

Alls er um að ræða um þúsund tonn úr sjó eða 700 tonn af frystum afurðum í 28.415 kössum. Fram kemur í færslu Grindavíkurhafnar að verðmæti afurðanna sé um 323 milljónir króna.

Túrinn var um 30 daga og var veitt suður og vestur af landinu. Haft er eftir Sigurði Jónssyni, skipstjóra á Tómasi Þorvaldssyni, að hægt hafi verið að veiða allan tímann þrátt fyrir „rysjótt veðurfar“. Þá fékkst gullax í um 11.500 kassa út af Suðurlandi og svo þorskur, ufsi og ýsa á Vestfjarðarmiðum

Áhöfn Sigurðar er nú komin í jólafrí en Bergþór Gunnlaugsson mun ásamt áhöfn sinni halda í síðustu veiðiferð skipsins fyrir jólastopp.

• Blogga um frétt