Skipstjóri skaust með sýnin í bæinn

Skipið Patrekur varð heima í höfn að sitja og fiskvinnsla Odda hf. á Patreksfirði hefur ekki getað starfað síðan á miðvikudag eftir að þrír skipverjar greindust smitaðir af Covid-19 sem og tíu starfsmenn fiskvinnslunnar.

Skjöldur Pálmason, framkvæmdastjóri Odda hf., segir afskaplega rólegt um að litast á Patreksfirði að undanförnu vegna þess hve stór hluti íbúa sé í sóttkví, en sem betur fer virðist sýnatökur síðustu daga ekki hafa leitt í ljós nein ný smit.

Á laugardag voru tekin fjölmörg sýni en í gær var stærsti sýnatökudagurinn. Sýni sem höfðu verið tekin um morguninn áttu að fara með flugi í bæinn í hádeginu en þegar fluginu var aflýst bauð einn skipstjórinn sig fram til að bruna í bæinn með sýnin í skottinu til þess að freista þess að fá niðurstöðurnar í tæka tíð fyrir byrjun vinnuvikunnar.

Það er mikið í húfi að sögn Skjaldar, en sóttkvíin, og lamandi áhrif hennar á fyrirtækið, hafa reynst þungbær. Með snörum handtökum tókst þó að bjarga hráefni og verðmætum fiskvinnslunnar, svo ekki færi til spillis, áður en skella þurfti í lás og allir sendir heim í sóttkví.

Skjöldur býst við því að með því að hluti starfsmanna losni úr sóttkví, geti fyrirtækið haldið uppi lágmarksvinnslu fyrir mikilvægustu viðskiptin, en fram undan sé afar mikilvægur tími í sölu hjá fyrirtækinu og því vonast hann til þess að það bætist ekki margir í hóp þeirra smituðu. Aðspurður segir hann að þetta atvik muni líklega verða til þess að fyrirtækið endurskoði hvort hægt sé að gera betur í hólfaskiptingu og smitvörnum hjá fyrirtækinu.