Alþjóðahafrannsóknaráðið (ICES) hefur birt upphafsráðgjöf um veiðar á loðnu á vertíðinni 2022/2023 og nemur hún 400 þúsund tonnum, að því er fram kemur í tilkynningu á vef Hafrannsóknastofnunar. Um er að ræða töluvert minna en ráðgjöfin fyrir 2021/2022 sem nemur rúmlega 900 þúsund tonnum, en 400 þúsund tonn er langt umfram meðal vertíð undanfarinna ára.

Í tilkynningunni segir að ráðgjöfin sé í samræmi við gildandi aflareglu strandríkja að stofninum. „Þessi ráðgjöf byggir á mælingum á stærð ókynþroska hluta loðnustofnsins, eins og tveggja ára, í september síðastliðnum í leiðöngrum Hafrannsóknastofnunar og systurstofnunar hennar á Grænlandi. Samtals mældust um 130 milljarðar af ókynþroska eins og tveggja ára loðnu sem er nægjanlegt magn til að gefa hámarks upphafsráðgjöf sem aflareglan leyfir, eða 400 þúsund tonn. Þetta er sama upphafsráðgjöf og ICES gaf fyrir ári síðan fyrir núverandi vertíð en þá var vísitalan 146 milljarðar.“

Upphafsráðgjöfin verður endurskoðuð að loknum mælingum sem fyrirhugaðar eru í september 2022.

Tengdar fréttir

Loðnuveiðar

Loðnumælingar gefa ekki ástæðu til bjartsýni

• Sást til loðnu norður af Vestfjörðum
• Loðnumæling tafðist er Árni leitaði í var
• Fyrstu skipin til loðnumælinga
• „Við urðum örlítið varir við loðnu“

» Fleiri tengdar fréttir

• Blogga um frétt