Óðinsbryggjan gamla er að hverfa
Setja bókamerki
Nýlega var hafist handa við að rífa Óðinsbryggjuna, gamla trébryggju sem er milli Sjóminjasafnsins og Kaffivagnsins. Bryggjan var dæmd ónýt og verður sams konar bryggja byggð í hennar stað.
Faxaflóahafnir buðu fyrr á árinu út endurbyggingu Óðinsbryggju. Tvö tilboð bárust og voru bæði yfir kostnaðaráætlun, sem hljóðaði upp á 82 milljónir króna. Töng ehf. bauðst til að vinna verkið fyrir rúmar 156 milljónir og Aðalvík fyrir tæpar 117 milljónir. Samið var við Aðalvík á grundvelli tilboðsins. Verklok eru sett 31. mars 2022. Reynt er að haga verktímanum þannig að sem minnst röskun verði yfir sumartímann þegar aðsókn er meiri í Sjóminjasafnið og í Óðin, samkvæmt upplýsingum Magnúsar Þórs Ásmundssonar hafnarstjóra.
Harðviður verður notaður í nýju bryggjuna og voru kaupin einnig boðin út. Sex tilboð bárust og var það lægsta 270 þúsund evrur, eða nálægt 40 milljónum íslenskra króna.
Við verkið er notaður öflugur prammi í eigu Faxaflóahafna en hann hefur reynst drjúgur við ýmsar framkvæmdir á höfnunum undanfarna áratugi. Þetta var upphaflega ekjubrú fyrir farþegaskipið Eddu og síðar var hún líka notuð fyrir ekjuskipin Álafoss, Eyrarfoss og enn síðar Laxfoss og Brúarfoss.
Sumarið 1983 hófu Eimskip og Hafskip rekstur bílaferjunnar Eddu sem sigldi milli Reykjavíkur, Newcastle í Bretlandi og Bremerhaven í Þýskalandi. Skipafélögin stofnuðu sameiginlega dótturfyrirtækið Farskip gagngert til þess. Edda gat tekið 900 farþega og 160 bíla. Hún kom í fyrsta skipti til Reykjavíkur 1. júní en rekstri var hætt 15. október, enda varð nokkurt tap af rekstrinum.
Fjórar trébryggjur í Vesturhöfninni
Í Vesturhöfn Gömlu hafnarinnar í Reykjavík eru fjórar timburbryggjur. Sú nyrsta, Síldarbryggjan við Marshallhúsið, hefur verið breikkuð og endurbætt á síðustu áratugum og telst í þokkalegu ástandi. Innri bryggjurnar þrjár, við Kaffivagninn, kallast einu nafni Verbúðabryggjur. Ytri bryggjurnar tvær voru endurnýjaðar upp úr 1990.
Innsta bryggjan við Sjóminjasafnið hefur lítið viðhald fengið síðustu áratugi. Hún var dæmd ónýt árið 2018 og ákvað stjórn Faxaflóahafna að láta vinna að hönnun nýrrar bryggju og nú er komið að framkvæmdum. Bryggjan verður 60 metra löng og sjö metra breið timburbryggja á timburstaurum.
Við gömlu bryggjuna hafa legið varðskipið Óðinn og dráttarbáturinn Magni undanfarin ár, en bæði þessi skip hafa verið tekin úr notkun. Hefur bryggjan oft verið nefnd Óðinsbryggja, enda er skipið nú eins konar sjóminjasafn. Meðan á niðurrifi stendur liggur Óðinn við Síldarbryggjuna en gamli Magni við Ægisgarð.
Tók þátt í þremur þorskastríðum
Varðskipið Óðinn kom til landsins 27. janúar 1960 en hann var smíðaður í Álaborg í Danmörku árið 1959. Óðinn tók þátt í öllum þremur þorskastríðunum á 20. öldinni. Síðasta siglingin á vegum Landhelgisgæslunnar var farin í júní 2006 og nú er Óðinn hluti af Sjóminjasafninu Grandagarði.
Dráttarbáturinn Magni var smíðaður í Stálsmiðjunni í Reykjavík 1954 og hannaður af Hjálmari R. Bárðarsyni skipaverkfræðingi (1918-2009) fyrir Reykjavíkurhöfn. Hann var í notkun til 1986. Magni var fyrsta stálskipið sem Íslendingar smíðuðu.
„Börn heima sem maður myndi vilja hafa í skjóli“
„Óviðunandi eftirlit með börnum“
Beint: Ellefu ráðuneyti í stað tólf
Víkingar komnir yfir 800 milljónir í greiðslur
Þetta eru ráðherrar ríkisstjórnarinnar
Ók á hóp fólks á jólamarkaði: Einn látinn
Stóðu skógarþjófa að verki