Þurrkarar vegna smíða nýrrar fiskimjölsverksmiðju Síldarvinnslunnar á Neskaupsstað voru afhentir á dögunum en þeir komu til landsins í vikunni, samkvæmt upplýsingum frá vélsmiðjunni Héðni sem annast verkefnið.

Þurrkararnir eru  hannaðir að fullu af Héðni en smíðaðir í Rúmeníu og eru þeir hluti af svokallaðri HPP próteinverksmiðju frá fyrirtækinu sem er byggð á íslensku verk- og hugviti í hátæknigeira og var í þróun hjá Héðni í um áratug. HPP er bæði til í útfærslu til að hafa um borð í skipum og á landi.

Samningar um uppsetningu á 380 tonna fiskimjölsverksmiðju á Neskaupstað voru undirritaðir í mars og er um að ræða um 1,7 milljarða króna framkvæmd.

Frétt af mbl.is

Héðinn smíðar fyrir Síldarvinnsluna

Fyrsta fór í Sólbergið

Samkvæmt upplýsingum frá Héðni tekur HPP verksmiðja „að minnsta kosti 30 prósent minna pláss, er með 30 prósent færri íhlutum og eyðir 30 prósent minni orku en hefðbundnar fiskimjölsverksmiðjur.“ Fyrsta útgáfan af slíkri próteinverksmiðju var sett upp í Sólberg ÓF-1, sem Rammi hf. gerir út.

Fram kemur að „í hefðbundinni fiskimjölsverksmiðju eru 21 aðalhlutar og orka er sett inn á átta stöðum. Í HPP verksmiðjunni eru sjö aðalhlutar og orka er sett inn á tveimur stöðum. Vinnslugeta verksmiðjanna er frá 10 til 400 tonnum á dag, eftir stærð.“

Sólberg ÓF-1 í heimahöfn á Ólafsfirði. mbl.is/Sigurður Bogi

Sex milljarðar

Á undanförnum árum hafa vinsældir HPP verksmiðjunnar aukist og hefur Héðinn selt þær til útgerða og í landvinnslur í Bandaríkjunum, Þýskalandi, Færeyjum, Englandi, Finnlandi, Frakklandi og Noregi. Verðmæti sölu til erlendra ríkja nemur um sex milljarða íslenskra króna.

Fjórar HPP verksmiðjur hafa verið seldar hér á landi meðal annars um borð í Ilivileq, sem Arctic Prime Fisheries á Grænlandi gerir út.

Þurrkararnir eru stórir. Ljósmynd/Jakob Valgarð Óðinsson

Tengdar fréttir

Síldarvinnslan

Samherji tekur Birting á leigu

• Fjölnir til Noregs
• Kaup Síldarvinnslunnar ganga til baka
• Sjóvá og Síldarvinnslan áfram í samstarfi
• Samfélagsspor Síldarvinnslunnar yfir 10 milljarðar

» Fleiri tengdar fréttir

• Blogga um frétt