„Þetta snertir ekki aðeins fyrirtækin heldur er það högg fyrir þjóðina að við skulum vera í þessari stöðu í landi sem er fullt af vatnsorku og orku úr öðrum endurnýjanlegum orkulindum sem við höfum ekki beislað. Það segir okkur að menn hljóta að þurfa að meta orkuþörfina til að ná settum loftslagsmarkmiðum fyrir árið 2030,“ segir Gunnþór Ingvason, framkvæmdastjóri Síldarvinnslunnar, um takmörkun á raforkuafhendingu til fiskimjölsverksmiðja landsins.

Þetta kemur fram í Morgunblaðinu í dag.

Landsvirkjun hefur ákveðið að takmarka afhendingu á raforku til verksmiðjanna sem samið hafa um kaup á skerðanlegri raforku. Verður afhendingin takmörkuð við 25 megavött í janúar en á fullum afköstum geta verksmiðjurnar nýtt um 100 MW. Skerðingin getur því orðið 75%. Takmörkunin heldur áfram í vetur, ef aðstæður krefjast.

Mikil orkunotkun framundan

Friðrik Mar Guðmundsson, framkvæmdastjóri Loðnuvinnslunnar á Fáskrúðsfirði, segir að Landsvirkjun hafi verið búin að láta vita að það gæti komið til einhverra skerðinga en eftir sé að taka umræðu um þessar miklu skerðingar sem tilkynntar hafa verið.

Gunnþór bendir á að fiskimjölsiðnaðurinn sé langstærsti raforkunotandi landsins, fyrir utan stóriðjuna. Mikil orkunotkun er fram undan hjá verksmiðjunum vegna vona um bestu loðnuvertíð í tæpa tvo áratugi.

Tengdar fréttir

Umhverfisvitund

Málflutningur VG „ómarkviss“ í umhverfismálum

• Hætta á að Vesturlöndin kaupi sig frá aðgerðum gegn losun
• Heildarflatarmálið stækkar við endurskoðun
• Fanga losun frá stóriðju og nýta í eldsneyti
• BM Vallá og Kapp hlutu umhverfisverðlaun

» Fleiri tengdar fréttir