„Ég mun sakna heilbrigðismálanna“

Svandís Svavarsdóttir, nýr sjávarútvegs- og landbúnaðaráðherra, segir mörg mikilvæg verkefni bíða hennar í embætti og að mörg sóknarfæri séu í þeim málaflokkum sem hún fer nú með. Svandís viðurkennir þó að hún eigi eftir að sakna heilbrigðismálanna.

Þetta er meðal þess sem fram kemur í ítarlegu viðtali í 200 mílum, sérblaði um sjávarútveg, sem fylgir Morgunblaðinu í dag.

„Það var náttúrlega mikil breyting við þessa nýju ríkisstjórn og margir ráðherrar sem breyttu um verkefni. Í mínu tilviki er þetta mjög mikil breyting, en um leið hangir þetta allt saman þegar öllu er á botninn hvolft,“ svarar Svandís spurð hvernig sé að taka við embættinu.

Frétt af mbl.is

Svandís segir Willum alltaf geta „hringt í vin“

„Heilbrigðismálin eru málaflokkur sem er aðkallandi á öllum tímum og það eru alltaf brýn verkefni á borði heilbrigðisráðherra. Það er alveg sama hvenær það er og hver ráðherrann er, en þegar Covid bætist þar ofan á og allar þær ákvarðanir sem hefur þurft að taka – oft mjög hratt, oft þótt það væri helgi, jól eða hásumar – þá gildir að ráðfæra sig við okkar besta fólk og byggja á samstöðu bæði hjá stjórnvöldum og ekki síður hjá samfélaginu öllu. Þarna hefur verið mjög sterk tilfinning fyrir verkefninu öllu og það hefur verið gæfa okkar að hafa mjög öflugt fólk í öllum stöðum í þessari glímu. Mér fannst ekkert auðvelt að sleppa þessum málaflokki, en Willum [Þór Þórsson] er maður sem ég treysti mjög vel til að halda á þessu kefli,“ segir hún.

Svandís ræðir einnig um fiskeldismál, græn umskipti og stjórnmálalega nálgun sína svo eitthvað sé nefnt. Viðtalið má finna hér.