Útflutningur sjávarafurða ekki meiri í áratug

Útflutningsverðmæti sjávarafurða nam 28,2 milljörðum króna í nóvember og er það töluvert meira en í nóvember í fyrra. Aukningin nemur um 25% í krónum talið og er hún meiri í erlendri mynt, eða rúm 32%, að því er fram kemur á Radarnum. Þars egir að gengi krónunnar hafi haft áhrif þar sem það hafi verið 6% sterkara í nóvember en í sama mánuði fyrir ári.

„Eins má ætla að þorskurinn skýri einhvern hluta þar sem veruleg aukning er á verðmætum útfluttra ferskra afurða, eða sem nemur um 34% á föstu gengi. Nam verðmæti þeirra um 8,5 milljörðum króna í mánuðinum, en það hefur aðeins tvisvar sinnum áður verið meira í einum mánuði. Í raun er aukning í öllum flokkum á milli ára, að undanskildum söltuðum og þurrkuðum afurðum þar sem lítilsháttar samdráttur mælist og á lýsi, en þar er rúmlega 43% samdráttur. Lýsi er hér flokkað með fiskimjöli á myndinni, en útflutningsverðmæti á mjöli eykst um tæp 50% á milli ára á föstu gengi og vegur þá upp, og gott betur, þann samdrátt sem er vegna lýsis,“ segir á Radarnum.

Loðnuvertíðin mun skila sínu. mbl.is/Eggert Jóhannesson

268 milljarðar

Fram kemur að á fyrstu 11 mánuðum ársins hafi útflutningsverðmæti sjávarafurði verið 268 milljarðar króna sem er um 9% aukning miðað við sama tímabil í fyrra, 11% ef tekið er tillit til gengisáhrifa.

Útflutningsverðmæti annarra sjávarafurða er komið í rúma 29 milljarða króna og hefur ekki verið meira að minnsta kosti undanfarinn áratug. Undir þennan flokk fala meðal annars loðnuhrogn. „Frá sama tímabili í fyrra er um 93% aukning að ræða á föstu gengi.“

Útflutningur á heilfrystum fiski hefur náð 35 milljörðum króna á fyrstu ellefu mánuðum sem er 22% meira en á sama tímabili í fyrra, skiptir loðnan töluverðu máli í þeim efnum. Þá hefur orðið 12% aukning í útflutningi ferskra afurða og nemur verðmæti þeirra 79 milljörðum króna, hafa evrðmætin aldrei verið meiri. Útflutningsverðmæti frystra flaka hefur aukist um rúm 3% á milli ára og lýsi um 2%.

Ferskar og frystar þorskafurðir skipa mikilvægan sess. mbl.is/Kristinn Benediktsson

Samdráttur en búist við vexti

Þrátt fyrir mikla aukningu í sumum afurðaflokkum hefur orðið samdráttur í öðrum. Til að mynda hefur verðmæti saltaðra og þurrkaðra afurða dregist saman um 5% á föstu gengi. Jafnframt ehfur orðið rúmlega 7% samdráttur í verðmæti útfluttrar rækju.

Í fiskimjöli hefur orðið rúmlega 8% samdráttur og útflutningsverðmæti þess ekki verið minna á þessum áratug. „Vafalaust mun verða viðsnúningur í þeim efnum á næstu mánuðum með þeim stóra loðnukvóta sem úthlutað var á yfirstandi fiskveiðiári.“

Frétt af mbl.is

662 þúsund tonn til íslenskra skipa

• Blogga um frétt