Vissir um að skatan gæti drepið veiruna

Félagar í Lionsklúbbi Ólafsvíkur hafa í tugi ára verkað skötu sem þeir selja á veitingastaði víða um land. Þeir segja eftirspurnina mikla og aukast með árunum.

Félagarnir taka tólf tíma vinnutörn og voru enn að þegar blaðamaður mbl.is náði í einn þeirra, Magnús Guðni Emanúelsson, undir kvöld.

„Við erum með ekta skötu. Þetta byrjaði hjá okkur fyrir tugum ára þegar við í Lions fórum út að borða saman á veitingastöðum, okkur til ánægju ásamt mökum, og síðan í framhaldi af því fórum við að verka sjálfir,“ segir Magnús.

Orðið að jólahefð

„Þetta er jólahefð hjá okkur félögunum. Við höfum alltaf verið með skötukvöld fyrir um 80 manns en höfum sleppt því núna síðustu tvö ár vegna ástandsins.

Við sóttum um styrk hjá ríkinu, um hvort skatan myndi ekki drepa kórónuveiruna, en þeir vildu ekki styrkja okkur. Við vorum alveg vissir að hún myndi steindrepa hana þar sem hún er svo sterk,“ segir Magnús kíminn í bragði.

• Blogga um frétt