Mokveiði að sögn Gylfa skipstjóra

„Það er mok í dag,“ segir Gylfi Scheving Ásbjörnsson, skipstjóri á beitningarvélabátnum Tryggva Eðvars SH frá Ólafsvík.

„Við lögðum eina og hálfa lögn og aflinn er 27 tonn þar af 7 tonn af ýsu sem fer í slæingu og flokkun á fiskmarkaði Snæfellsbæjar og svo verður þorskurinn sendur í vinnslu hja FISK á Sauðárkróki,“ segir Gylfi. Hann bætir við að ýsan var seld á fiskmarkaði, en óslægð ýsa er á góðu verði eða um 375 krónur á kíló.

Afli báta á Snæfellsnesi hefur verið eindæma góður að undanförnu og hefur netabáturinn Bárður SH landað 40 til 50 tonnum á dag, og línubátar hafa einnig gert það gott ásamt þeim fáu dragnótabátum sem hafa róið að undanförnu en flestir þeirra eru komnir í jólafrí.

Frétt af mbl.is

Skælbrosandi skipverji með vænan afla í Ólafsvík

• Blogga um frétt