„Við erum bara á öðru hali. Við komumst ekki út fyrr en í gærkvöldi vegna Covid-skimana sem við þurftum að fara í á Sauðárkróki í gær,“ segir Ágúst Ómarsson, skipstjóri á Drangey SK-2, er blaðamaður skellir á þráðinn í þeim tilgangi að spurja um gang veiða.

Skuttogarinn sem FISK Seafood gerir út er nú staddur á Halamiðum út af Vestfjörðum ásamt fjölda annarra íslenskra skipa sem eru að ná í afla á stuttu veiðitímabili milli hátíðanna.

„Það er reyndar búin að vera mjög góð veiði hjá þeim skipum sem hafa verið hérna á Halanum. Þetta er langmest þorskur og aðeins af ufsa. Þetta er fínn þriggja til fjögurra kílóa fiskur,“ segir Ágúst. „Það er nú bræla núna. Leiðinda norðaustanfýla en það lægir í kvöld,“ bætir hann við.

Ekki skemmtilegustu túrarnir

Spurður hvort átið yfir hátíðarnar hafi nokkuð verið að sliga mannskapinn svarar hann: „Neinei,“ og hlær. „Þetta eru ekkert skemmtilegustu túrarnir að fara svona milli hátíða en þeir eru yfirleitt stuttir. Við verðum bara að útvega fisk sem á að vinna eftir áramótin og þá er þetta bara svona. Þetta fylgir starfinu.“

Ágúst segir stefnt að því að koma til hafnar á Sauðárkróki um miðnætti á fimmtudag en nákvæm tímasetning velti á gangi veiða. „Það var mjög fínt fiskirí fyrir jól hérna fyrir vestan og hefur byrjað mjög vel núna. Ég heyri ekki annað en það sé búið að vera gott fiskirí hérna. Svo voru skip í Víkurálnum í nótt, Viðey og Helga María. Þau voru að fá afla en það var mest karfi.“

Tengdar fréttir

Kórónuveiran Covid-19

Ekkert um alvarleg veikindi

• Skyldasti ættingi SARS „var í þeirra eigin ísskáp“
• Almenningur fékk ekki nægan aðgang að samningum
• Við höfum „runnið til baka niður brekkuna“
• Grípa til aðgerða: Covid-19 breiðist hratt út

» Fleiri tengdar fréttir

FISK Seafood

Samfélagssporið jókst um 20% milli ára

• Höfnin stendur samkeppnishæfni fyrir þrifum
• Kaupa 100 tonna kvóta af Saltveri
• 300 milljóna króna afla landað á Sauðárkróki
• Ný ytri höfn forsenda uppbyggingar

» Fleiri tengdar fréttir

• Blogga um frétt