Kaupa fiskmarkað í Bolungarvík undir sláturhús
Setja bókamerki
Fiskeldisfyrirtækið Arctic Fish ehf. á Vestfjörðum hefur í gegnum dótturfélag sitt fest kaup á nýbyggingu Fiskmarkaðs Bolungarvíkur að Brimbrjótsgötu 12 í Bolungarvík. „Fyrirhugað er að koma upp laxasláturhúsi í byggingunni og vill félagið tryggja sér húsnæði með það í huga,“ að því er fram kemur í tilkynningu frá Arctic Fish.
Framleiðsla fiskeldis fyrirtækisins heldur áfram að aukast og er séð fram á að stöðva þurfi vöxt ef sláturgeta vex ekki í takti við framleiðsluaukninguna. Arctic Fish hafi því talið nauðsynlegt að flýta fyrir uppbyggingu í kjölfar mikillar óvissu um samstarf við önnur fiskeldisfélög á Vestfjörðum um nýtt sláturhús.
Nokkur óvissa skapaðist um staðsetningu nýs sláturhúss eftir að Ísafjarðarbær gerði mistök við gerð lóðarleigusamnings sem leiddi til þess að ÍS47 ehf. er með afnotarétt lóðar undir húsum sem eru í eigu Arctic Fish.
„Sláturmál fyrirtækisins hafa verið í skoðun um nokkurt skeið og hefur þar verið horft til þess að nýta stærðarhagkvæmni þess að byggja eitt stórt sláturhús fyrir stærsta hluta þeirrar framleiðslu sem kemur frá Vestfjörðum,“ segir í tilkynningu Arctic Fish vegna kaupanna á nýju húsnæði á Bolungarvík.
Fram kemur að margir staðir hafa verið til skoðunar auk samstarfs við önnur eldisfyrirtæki um þá framkvæmd í nokkrum sveitarfélögum. Hins vegar hafi sú vinna dregist og ekki vitað hvenær henni lýkur, þó liggur fyrir að byggingartími nýs sláturhúss geti verið um tvö ár.
„Með því að kaupa umrætt húsnæði sem hentar vel fyrir þessa starfsemi og er nánast tilbúið er mögulegt á tiltölulega stuttum tíma að koma upp sláturhúsi sem annar þeirri framleiðslu sem fram undan er. Þrátt fyrir að ákvörðun um fjárfestingu í sláturhúsi liggi ekki fyrir vill félagið tryggja sér húsnæðið með það að markmiði að koma þar upp sláturhúsi sem annar framleiðslu fyrirtækisins,“ segir Stein Ove Tveiten, forstjóri Arctic Fish, í tilkynningu fyrirtækisins.
Lát hjóna í Neskaupstað: Ákæra gefin út
Samfylking og Viðreisn gáfu loforð
„Þetta er ríkisstjórn almannahagsmuna“
Víkingar komnir yfir 800 milljónir í greiðslur
„Mér finnst gamla Samfylkingin komin aftur“
Funda með þingflokkum
Skattamál verði líklega „þeirra mesta klemma“
