Snæfellingar fiskuðu vel þrátt fyrir leiðindaveður

Milli hátíðanna sóttu smærri línubátar frá Snæfellsbæ sjóinn af fullum krafti þrátt fyrir leiðindaveður. Bátar leituðu suður fyrir Öndverðarnes til þess að komast í skjól frá norðaustanáttinni.

Á föstudag tók fréttaritari stöðuna á veiðunum og var þá Kvika SH búin að landa tvisvar á Arnarstapa og verið með um átta tonn í róðri, en Indriði Kristins BA var við bjargið og sögðu skipsverjar að leiðindaveður hafi verið en þó sléttur sjór.

Helmingur línunnar eftir

Indriði Kristins landaði í Ólafsvík á föstudag, alls 24 tonnum. „Þetta er á rúmlega eina lögn og urðum við að skilja eftir næstum helming línunnar í sjó vegna þess að öll kör í bátnum voru orðin full,“ sagði Magnús skipsverji á Indriða.

„Við förum út  aftur strax og við erum búnir að landa en þessi afli fer í vinnslu hjá Kambi í Hafnarfirði, en við munum landa næst heima á Tálknafriði,“ sagði hinn sí brosandi Magnús að lokum.

Aðrir línubátar sem róa hafa einnig fengið mjög góðan afla og netabáturinn Bárður SH var með sjö tonn á föstudag.

Indriði Kristins að koma til hafnar í Ólafsvík í kaldaskít. mbl.is/Alfons

• Blogga um frétt