Bryggja á Grundartanga skemmdist í ásiglingu

Óhapp varð í liðnum mánuði þegar súrálsskipið Selena kom með farm til Grundartanga. Bakborðskinnungur skipsins rakst harkalega í bryggjuna, sem skemmdist á 12-15 metra kafla. Dæld og rispur komu á bakborðskinnung Selenu en ekki kom gat á skipið.

Þessar skemmdir hafa ekki áhrif á hafnarstarfsemina, að því er Magnús Þór Ásmundsson, hafnarstjóri Faxaflóahafna, upplýsir. Ekki kom gat á bryggjuþilið en sprunga sem þarf að gera við o.fl.

Dæld og rispur komu á bakborðsinnung súrálsskipsins. Ljósmynd/Faxaflóahafnir

Nákvæm kostnaðuráætlun liggur ekki fyrir en ljóst að kostnaðurinn er talsverður. Áætlað er að viðgerð fari fram næsta vor. Útgerð skipsins eða tryggingarfélag hennar mun væntanlega bera kostnaðinn.

Rannsókn hefur farið fram á atvikinu, segir Magnús. Ljóst sé að orsakirnar séu margþættar og hægt verði að draga lærdóm af atvikinu.