Vilja kaupa vistvæna dráttarbáta

Ríkiskaup, fyrir hönd Ísafjarðarhafnar, Hornafjarðarhafnar og Vestmannaeyjahafnar, hafa óskað eftir upplýsingum vegna fyrirhugaðra opinberra innkaupa. Þetta er auglýst á vefnum utbodsvefur.is.

Ráðist hefur verið í undanfarandi markaðskönnun (e. RFI) á Evrópska efnahagssvæðinu, til að kanna fýsileika þess að kaupa orkuskiptan dráttarbát fyrir ofangreindar hafnir, segir í auglýsingunni.

Hafnirnar hafi hug á því að fjárfesta í nýjum dráttarbátum á næstu misserum. Markaðskönnun þessi byggist á heimild í 45. gr. laga um opinber innkaup. Markmið hennar er að undirbúa innkaup og upplýsa fyrirtæki um áformuð innkaup og kröfur varðandi þau, afla upplýsinga um markaðinn og fá ráðgjöf, t.a.m. um fýsileika orkuskiptra dráttarbáta, þó án þess að raska samkeppni á markaðnum. Í slíkri markaðskönnun felist þó ekki skuldbinding um að fara í útboð.

Áhugasamir aðilar eru beðnir um að leggja fram upplýsingar um þær lausnir sem þeir hafa upp á að bjóða.

Allar nánari upplýsingar um útboðið er að finna í útboðskerfi Ríkiskaupa. Tilboð verða opnuð 1. mars næstkomandi.

Lóðsbátur Hornfirðinga heitir Björn lóðs, 48 brúttótonna stálbátur, smíðaður 1991. Lóðsbátur Ísfirðinga er Sturla Halldórsson, 37 brúttótonna stálbátur, smíðaður 2005. Vestmannaeyjahöfn á og rekur Lóðsinn, 156 brúttótonna stálbát, sem smíðaður var um síðustu aldamót.