Erling í brotajárn eftir bruna um borð

Í stað þess að vera byrjaðir netaróðra eins og venjulega á þessum árstíma vinna skipverjar á Erling KE 140 að því að hirða það sem er nýtilegt úr skipinu. Það skemmdist í bruna um áramótin þar sem það lá við bryggju í Njarðvíkurhöfn án þess að nokkur yrði var við eldinn. Ekki er talið svara kostnaði að gera við skipið, sem er tæpra 60 ára og verður það væntanlega dregið til Belgíu þar sem það fer í brotajárn.

Þosteinn Erlingsson, útgerðarmaður í Saltveri í Keflavík, segir að unnið sé að því að fá annað skip í stað Erlings, hvort sem það verði keypt eða leigt. Mestu skipti að ekkert tjón hafi orðið á fólki í brunanum.

Erling KE er myndarlegt skip. Það mun enda sem brotajárn. mbl.is/Sigurður Bogi

Allt svart og á kafi í sóti

Halldór Guðjón Halldórsson, skipstjóri á Erling KE síðustu tólf ár, segist hafa farið frá borði síðdegis fimmtudaginn 30. desember. Þegar hann hafi síðan komið til vinnu á mánudagsmorgni eftir áramót hafi aðkoman verið nöturleg.

„Allt var svart og á kafi í sóti,“ segir Halldór. „Við vonuðum fyrst að pústið hefði gefið sig því ljósavélin var í gangi, en fljótlega kom í ljós að eldur hafði mallað í mannlausu skipinu í einhvern tíma. Brunatjón varð einkum í setustofu framan við borðsalinn, en sót var um allt; í íbúðum og uppi í brú. Netin voru komin á bryggjuna og til stóð að fara út að leggja, en það verður einhver bið á því,“ segir Halldór. Ekki er vitað um eldsupptök.

Erling KE var smíðaður í Noregi 1964 og er 250 tonn. Á skipinu eru um 1.500 þorskígildistonn, þar af um 1.200 tonn af þorski. Áður hefur skipið borið nöfnin Óli á Stað, Júlli Dan, Barðinn, Skírnir og Akurey og verið gert út frá ýmsum stöðum.

Miklar skemmdir voru eftir brunan. Ljósmynd/Aðsend