Engar umsagnir bárust um túnfiskveiðar

Engar umsagnir hafa verið birtar í samráðsgátt stjórnvalda vegna áforma um lagasetningu sem á að hvetja útgerðir til að hefja veiðar á bláuggatúnfiski. Íslenskum yfirvöldum hefur tekist að tryggja landinu töluverðum aflaheimildum en fáir hafa sýnt veiðunum áhuga undanfarin ár.

Frétt af mbl.is

Vilja að Íslendingar hefji túnfiskveiðar á ný

„Til að stuðla að því að veiðar hefjist að nýju af Íslands hálfu er talið nauðsynlegt að lög veiti tímabundnar heimildir í ákvæðum til bráðabirgða að heimila íslenskum aðilum að taka á leigu sérhæfð erlend skip til veiða á bláuggatúnfiski, til að viðhalda veiðireynslu Íslands, kanna hagkvæmni veiðanna og byggja upp innlenda sérþekkingu á slíkum veiðum,“ segir í kynningu áformanna í samráðsgáttinni.

Opnað var fyrir umsögnum 5. janúar og lauk fresti í dag. Engar umsagnir virðast hafa borist vegna málsins, en ekki er víst að það endurspegli áhuga eða áhugaleysi á veiðunum.

Afurðin er verðmæt og seldi heildsalinn Chuo Gyorui Co, í Japan, 44 túnfiska í dag á meðalverðinu 5.847 jen á kíló, jafnvirði 6.558 íslenskra króna. Hæsta verð á kíló sem fékkst nam 13.500 jenum eða rúmar 15 þúsund íslenskar krónur.

• Blogga um frétt