Sigurður VE lét frá bryggju nú í morgun og er staddur skammt frá Dyrhólaey á leið á loðnumiðin. Í nótt var landað um 2.800 tonnum en það kann að hafa verið stærsti staki loðnufarmur sem landað hefur verið í Eyjum.

„Veiðin var góð meðan við vorum á miðunum. Við fórum frá Þórshöfn á fimmtudags morgni 13. janúar eftir að hafa landað þar og komum til Eyja á þriðjudags morgni 18., en siglingin af miðunum til Eyja tekur um 25 klukkustundir,“ segir Sigurfinnur Viðar Sigurfinnsson, matsveinn á Sigurði VE, í samtali við 200 mílur.

„Veður var allskonar eins og við má búast í janúar við Ísland, kaldafýla einn daginn og blíða þann næsta. Sluppum þó alveg við brælu og gátum því athafnað okkur allan tímann.“

Spurður hvernig hljóðið er í mannskapnum um borð svarar Sigurfinnur: „Stemningin og mórallinn um borð í Sigurði eru alltaf góð enda samheldin og góð áhöfn. En auðvitað eru menn alltaf kátari og glaðari þegar vel gengur.“