Náðu afla fyrir 4,2 milljarða króna

Uppsjávarskipinu Hoffelli SU-80 tókst að vera með mesta aflaverðmætið í fyrra meðal skipa Loðnuvinnslunnar á Fáskrúðsfirði. Alls nam verðmæti aflans sem skipið bar að landi 1.766 milljónum króna og var magnið 40.011 tonn. Um er að ræða 47% aukningu í aflaverðmæti milli ára, að því er segir á vef útgerðarinnar.

Ístogari útgerðarinnar, Ljósafell SU-70, var með næst mesta aflaverðmætið 2021 og var það 1.229 milljónir króna sme er þó 5% minna en árið á undan. Þá nam heildarafli skipsins 5.437 tonnum. Vakin er athygli á því að Ljósafell var frá veiðum vegna slipptöku og framkvæmdum við krapavélar í sjö vikur á síðasta ári.

Sandfell á siglingu. mbl.is/Hafþór Hreiðarsson

Góður gangur var krókaaflamarksbátunum Sandfelli SU-75 og Hafrafelli SU-65. Áhöfnin á Sandfelli tókst að afla 2.460 tonn fyrir 659 milljónir króna og er það 12% eukning verðmæta frá 2020. Áhöfninni á HAfrafelli tókst að ná 2.113 tonnum að verðmæti 555 milljónum króna í fyrra sem er 16% meira en árið á undan.

Heildarafli skipa Loðnuvinnslunnar var í fyrra 50.021 tonn og var aflaverðmætið 4.209 milljónir króna. Árið 2020 nam heildaraflinn 39.097 tonnum og var aflaverðmætið 3.561 milljón króna og nemur aukning verðmætanna milli ára 18%.

• Blogga um frétt