Naglinn gefst ekki upp

Þorrablótum hefur verið aflýst en fólk hættir ekki að borða þorramat og hákarlinn er eftirsóttur sem fyrr. „Ég er búinn að selja allan hákarl frá mér, síðasti skammturinn fór í Fiskbúðina í Trönuhrauni í Hafnarfirði,“ segir hákarlafangarinn og verkandinn Björgvin A. Hreinsson á Vopnafirði. „Ég veiddi og verkaði 11 hákarla á síðasta ári og það er ágætt, mér nægir að veiða tíu til fimmtán hákarla, en hver gefur um 80 kíló.“

Hreinn Björgvinsson, faðir Bjögga, stundaði hákarlaveiðar og sonurinn rann snemma á lyktina. „Ég hef verið með puttana í hákarlinum meira og minna alla ævi, fór fyrst með föður mínum á sjó þegar ég var átta ára og tók svo við af honum þegar hann hætti.“ „Varstu ekki bara nokkurra mánaða þegar þú byrjaðir,“ skýtur félagi hans inn í. „Haltu kjafti,“ svarar Bjöggi og heldur áfram þar sem frá var horfið. Hann hafi byrjað á tíu tonna báti og sé nú með sex tonna Sómabát. „Við erum ekki nema einn og hálfan til tvo tíma beint út á miðin. Hákarlinn er rólegheitaskepna og aðeins þegar þessar skepnur vefja línunni utan um sig er þetta svolítið bras en annars eru þær eins og lömb sem leidd eru til slátrunar.“

Bjöggi kom með 11 hákarla að landi í fyrra. mbl.is/Jón Sigurðarson

Bjöggi segir að vinnslan sé hefðbundin. Aflinn sé skorinn og síðan kæstur í 30 til 40 daga áður en hann sé látinn hanga í tvo og hálfan til þrjá mánuði. „Þetta fer mikið eftir veðráttu,“ útskýrir hann og vísar til þess að mikil úrkoma geti farið illa með afurðirnar og jafnvel eyðilagt þær.

Fullsnemmt að hætta

Fyrir tæpum tveimur árum var Bjögga vart hugað líf í kjölfar þess að hann kramdist á milli tveggja skipa eftir að hafa lóðsað flutningaskip frá Vopnafirði 18. mars. „Annar fóturinn klipptist nær af mér og ég var fluttur í land nær dauða en lífi en fætinum og lífi mínu var bjargað,“ rifjar hann upp. „Eftir það fór allt á hliðina hjá mér og ég er svolítið að brasa við þetta ennþá en gefst ekki upp. Ég er nagli.“

Frétt af mbl.is

„Ég átti 20 mínútur eftir ólifaðar“

Nánar má lesa um málið í Morgunblaðinu í dag.