Sigldi eftir að réttindin runnu út

Skipstjóri hjá Herjólfi fékk áminningu í starfi og var í kjölfarið lækkaður í tign eftir að upp komst að hann hefði haldið áfram að sigla skipinu eftir að atvinnuréttindi hans runnu út fyrir jól. Ríkisútvarpið greindi fyrst frá málinu.

Þar segir jafnframt að engin kæra hafi borist til lögreglunnar í Vestmannaeyjum og engin tilkynning eða kvörtun borist Samgöngustofu, aðeins fyrirspurnir.

Óheimilt er samkvæmt lögum að leggja skipi úr höfn án þess að allir skipverjar hafi verið lögskráðir og eitt af skilyrðum lögskráningar skipa er að skipstjórnarmenn hafi gild atvinnuskírteini.

Skráði nöfn annarra skipstjóra

Maðurinn var lögskráður skiptsjóri um borð þegar atvinnuréttindin runnu út og var áfram lögskráður eftir að réttindi hans runnu út samkvæmt Samgöngustofu.

Þá hafi maðurinn skráð nöfn annarra skipstjóra án þeirra vitundar þegar hann sigldi sjálfur. Stjórn Herjólfs er sögð líta málið alvarlegum augum og verklag endurskoðað til að koma megi í veg fyrir að sambærileg atvik endurtaki sig.

Skipstjórinn fékk atvinnuskírteinið endurútgefið hjá Samgöngustofu 4. janúar sl.

• Blogga um frétt