Tekjur í sjávarútvegi tvöfalt hærri en flestra

Meðaltekjur á mánuði fyrstu 10 mánuði 2021 voru meira en tvöfalt hærri í sjávarútvegi (samtala veiða og vinnslu) en meðaltal allra sem fengu staðgreiðsluskyld laun. Aðeins tekjur í fjármála- og tryggingaþjónustu voru hærri. Þetta kemur fram í tölum Hagstofunnar og fjallað er um í síðustu hagsjá Landsbankans.

Þar segir að meðaltekjur launafólks á mánuði hafi verið 434 þúsund krónur á tímabilinu, en meðaltekjur í sjávarútvegi voru 898 þúsund krónur og 924 þúsund krónur í fjármála- og tryggingaþjónustu. Næst á eftir sjávarútvegi eru meðaltekjur í opinberri stjórnsýslu sem námu 591 þúsund krónum. Tekið er þó fram að ekki er tekið tillit til vinnutíma í þessum samanburði.

„Á milli 2020 og tíu fyrstu mánaða ársins 2021 hækkuðu meðaltekjur allra á vinnumarkaði um 2,7%. Af þeim greinum sem hér eru sýndar hækkuðu tekjurnar mest í ferðaþjónustu, um 8,6%. Tekjurnar hækkuðu um 6-7% í sjávarútvegi, opinberri stjórnsýslu og heild- og smásölu. Fjármála- og vátryggingarstarfsemin er með mikla sérstöðu meðal þessara greina, en þar voru tekjur nær óbreyttar á milli ára.“ segir í Hagsjánni.

Hækkaði mest hjá opinberri stjórnsýslu

Meðaltekjur landsmanna hafa hækkað um 25% frá 2015 til 2021 en mest hækkaði hjá opinberri stjórnsýslu eða 41% . Meðaltekjur í sjávarútvegi hafa á þessu tímabili hækkað um 30,9% en hæstu meðaltekjurnar í fjármála- og tryggingaþjónustu hafa hækkað um 25,2%.

„Sé litið yfir lengri tíma má sjá að meðallaun hafa hækkað með nokkuð reglubundnum hætti í öllum greinum á tímabilinu frá 2015. Einu undantekningarnar eru í sjávarútvegi í upphafi tímabilsins og í ferðaþjónustunni eftir 2019,“ segir í Hagsjá Landsbankans. Jafnframt er vakin athygli á því að útfærsla kjarasamninga um krónutöluhækkanir hafi haft það í för með sér að hlutfallsleg hækkun hæstu launa hafi verið minni en í öðrum greinum.

Ekki kemur þó fram í greiningunni áhrif afkomutengdra tekna sjómanna í gegnum aflahlutdeild sem hafa veruleg áhrif á þróun meðaltekna í sjávarútvegi.

• Blogga um frétt