Björgunarskip í slipp eftir tjón í hvassviðrinu

Björgunarskipið Hannes Þ. Hafstein í Sandgerði varð fyrir tjóni við legupláss sitt í hvassviðrinu í gær. Við hamaganginn í veðrinu kom gat á bakborðssíðu skipsins rétt undir dekkinu en þó vel ofan sjólínu og fór því ekki sjór í skipið.

Þetta upplýsir Örn Smárason, verkefnastjóri sjóbjörgunar hjá Slysavarnafélaginu Landsbjörg, í tölvupósti til 200 mílna.

Þar segir að farið verður með skipið í slipp í Njarðvík í dag þar sem það verður tekið upp á flóðinu. „Í gærkvöldi þegar að haft var samband við slippinn í Njarðvík brugðust þeir við í hvelli og buðu pláss og viðgerð með hraði. Umfang tjónsins er ekki alveg ljóst og verður ekki fyrir en að skipið er komið í slippinn en mjög varlega áætlað tekur aldrei minna en 10 daga að gera við þetta tjón sem orðið hefur,“ skrifar Örn.

Tekur á sig mikinn vind

Vekur hann athygli á því að Hannes Þ. Hafstein sé af gerðinni Arun Class rétt eins og flest skip Landsbjargar. Þessi gerð hefur mörg góð einkenni að sögn Arnar en vindfang yfirbyggingarinnar sé ekki alltaf kostur. Í ljósi þess að hve mikinn vind skipið tekur á sig er nokkuð lán að frekara tjón varð ekki sérstaklega með tilliti til þess að það reyndi verulega á hafnarmannvirki í Sandgerði þegar skipið hálf lá á flotbryggjunni, útskýrir hann.

Björgunarskipið Hannes Þ. Hafsteinn. Ljósmynd/Ríkarður Ríkarðsson

„Á meðan á viðgerðinni stendur skoða sjálfboðaliðar í Sandgerði í samstarfi við höfnina þar hvað er hægt að gera til að koma í veg fyrir að svona tjón verði aftur. Sagt skal að samstarfið við Sandgerðishöfn hefur verið einstaklega gott þar sem skipið hvorki greiðir fyrir rafmagn né hafnargjöld,“ skrifar Örn.

Kostnaður vegna viðgerðanna á Hannesi Þ. Hafstein falla alfarið á herðar Landsbjargar þar sem eldri skip félagsins eru tryggð með húftryggingu með takmarkaðri ábyrgð. Örn segir gert sé ráð fyrir áföllum sem þessum í áætlunum viðhaldssjóðar björgunarskipa.

„Vonandi verða frátafir Hannesar ekki miklar, enda hafsvæðið sem hann sinnir mikið og fjölsótt af öllum gerðum skipa,“ segir hann að lokum.

• Blogga um frétt