Ísland stofnaðili að nýrri alþjóðastofnun

Ísland hefur gerst stofnaðili að nýrri alþjóðastofnunar um leiðsögu á sviði siglinga með undirritun samning þess efnis. Nýja stofnunin tekur við hlutverki IALA, alþjóðasamtaka vitastofnana á sviði leiðsögu skipa og vita (e. International Association of Marine Aids to Navigation and Lighthouse Authorities), að því er fram kemur í tilkynningu á vef stjórnarráðsins.

Vegagerðin og forverar hennar hafa verið aðilar að IALA allt frá stofnun samtakanna árið 1957, þegar þáverandi Vita- og hafnamálastofnun var formlega boðið að vera stofnaðili að samtökunum.

Í tilkynningunni segir að Unnur Orradóttir Ramette, sendiherra Íslands í París, hafi í gær skrifað undir samninginn fyrir hönd samgöngu- og sveitarstjórnarráðuneytisins og Vegagerðarinnar, sem fara með vita- og hafnamál. Alls hafa um 50 ríki undirritað samning um stofnaðild, en aðeins tæplega tíu ríki fullgilt stofnsáttmálann og verður stofnunin ekki að evruleika fyrr en þrjátíu hafa fullgilt hann.

Unnur Orradóttir Ramette, sendiherra Íslands í París, undirritaði stofnsáttmála nýrrar alþjóðastofnunar um leiðsögu á sviði siglinga fyrir hönd Íslands. Ljósmynd/Stjórnarráðið

„Það er afskaplega mikilvægt fyrir Ísland að hafa stigið þetta skref í átt að því að gerast stofnaðili alþjóðastofnunar á þessu sviði, sem ætlað er að taka við því hlutverki að efla enn frekar siglingaöryggi. Íslensk stjórnvöld hafa tekið virkan þátt í alþjóðastarfi um að bæta öryggi á sjó og hér á landi hefur náðst eftirtektarverður árangur sem aðrar þjóðir horfa til. Það er því rökrétt skref að taka þátt í starfi þessarar nýju alþjóðastofnunar,“ er haft eftir Sigurði Inga Jóhannssyni, innviðaráðherra, í tilkynningunni.

Aðalfundur stofnunarinnar verður haldinn á þriggja ára fresti en þar eiga öll aðildarríki sæti. Aðalfundur kýs í ráð stofnunarinnar, forseta, varaforseta og aðalritara. Framkvæmdaráð, sem samanstendur af 23 aðildarríkjum, forseta og varaforseta stofnunarinnar, fer með framkvæmdastjórn stofnunarinnar. Skrifstofa hennar er leidd af aðalritara. Loks verða nefndir skipaðar sem styðja við starfsemi stofnunarinnar.

• Blogga um frétt