Björgunarskip kallað út frá Rifi

Björgunarsveitir hafa sinnt þremur útköllum það sem af er degi, vegna slysa á landi og báts í vandræðum á sjó. 

Í tilkynningu segir að björgunarskipið Björg var kallað út frá Rifi rétt fyrir klukkan eitt í dag vegna vélarvana báts sem var á veiðum 15 sjómílur norður af Rifi.

Skipverjar Gísla Súrssonar GK fengu troll stykki upp með línunni er þeir voru að draga upp með þeim afleiðingum að stykkið fór í skrúfu bátsins og því ekki hægt að draga línuna upp né hreyfa við bátnum.

Áhöfn björgunarskipsins er nú komin með bátinn í tog og gerir ráð fyrir að vera komin með hann í land um klukkan 17.

Sjúkrabílar komust ekki á vettvang

Björgunarsveitir í Árnessýslu voru kallaðar út stuttu síðar að Suðurstrandavegi vegna konu sem hafði hrasað á göngu suður af Þorlákshöfn og slasast. Aðstoða þurfti hana að sjúkrabíl sem komst ekki á vettvang.

þá voru hópar björgunarsveitafólks sem voru við æfingar á Langjökli kallaðar til af Neyðarlínunni eftir að tilkynning barst um slasaða konu á svæðinu.

Snjóbíll og björgunarsveitarbíll fluttu konuna til móts við sjúkrabíl við Geysi.

• Blogga um frétt