Mál skipstjórans kornið sem fyllti mælinn

Alls hafa fjórir starfsmenn Herjólfs sagt upp störfum nýverið og er ástæðan sögð ólga milli starfsmannanna og fyrrverandi yfirskipstjóra.

Skipstjórinn sem um ræðir varð í þarsíðustu viku uppvís að því að stýra skipinu þrátt fyrir að réttindi hans væru útrunnin og skráði ferðirnar á aðra skipstjóra Herjólfs. Hann hlaut í kjölfarið áminningu og var lækkaður í tign úr yfirskipstjóra í almennan skipstjóra.

Frétt af mbl.is

Segja upp vegna skipstjóramálsins

Eftir að upp komst um málið sögðu tveir starfsmenn upp störfum, þau Sigmar Logi Hinriksson skipstjóri og Ingibjörg Bryngeirsdóttir stýrimaður.

Tveir aðrir stýrimenn höfðu þegar sagt störfum sínum lausum fyrr í vetur, fyrir brotið.

Heimildir Morgunblaðsins herma að ástæða uppsagnanna fjögurra sé ósætti vegna brotsins og eldri ágreiningsmála. Þá hafa ábendingar borist úr nokkrum áttum um að starfsanda fyrirtækisins hafi lengi verið ábótavant og nýlegt brot skipsjórans „kornið sem fyllti mælinn“.

Hafi unnið málið vel

„Svona almennt þá hefur þetta mál eðlilega tekið á áhöfnina,“ segir Hörður Orri Grettisson, framkvæmdastjóri Herjólfs, í samtali við Morgunblaðið.

„Við fengum ábendingar um þetta þegar þetta brot var afstaðið og tókum það mjög alvarlega.“ Málið hafi verið unnið með lögfræðingum fyrirtækisins og tilkynnt til Samgöngustofu og Vegagerðin upplýst um málið. Fyrirtækið hafi auk þess verið í sambandi við Félag skipstjórnarmanna, sem einnig var upplýst um málið.

„Við unnum [málið] vel að okkar mati. Tókum þá ákvörðun um að lækka hann í tign og veittum honum áminningu. Síðar var ákveðið að hann yrði sendur í ótímabundið leyfi meðan málið er í vinnslu.“

Nánari umfjöllun um málið má finna í Morgunblaðinu í dag.