Arnarlax hefur hafið framleiðslu í seiðaeldisstöð að Hallkelshólum í Grímsnesi. Fyrirtækið festi nýverið kaup á rekstrinum sem fram fer undir merkjum Fjallalax, en leifgir mannvirkið af landeigenda.

Í stöðinni, sem hefur verið rekin undir merkjum Fjallalax, var á dögunum komið fyrir um 500 þúsund hrognum, að því er fram kemur í tilkynningu fyrirtækisins.

Í síðustu viku veitti Matvælastofnun stöðinni 100 tonna rekstrarleyfi fyrir seiða- og mateldi á lax og bleikju.

Fram kemur að Matthew Chernin frá Kaliforníu í Bandaríkjunum sé stöðvarstjóri Fjallalax. Matthew, sem flutti til Selfoss á síðasta ári, er með meistaragráðu í ræktun sjávarafurða (e. aquaculture) frá NMBU-háskóla í Noregi. Jafnframt hefur hann áður starfað við fiskeldi í Washington-ríki í Bandaríkjunum auk þess að hafa starfað í greininni á Sri Lanka og í Noregi.

„Matthew hefur staðið í ströngu við undirbúning á aukningu framleiðslunnar síðustu misseri,“ segir í tilkynningunni.

Matthew Chernin. Ljósmynd/Arnarlax

Styrktu ferðasjóð Sólheima

Seiðaeldisstöðin að Hallkelshólum var byggð af Gísla Hendrikssyni og Rannveigu Björgu Albertsdóttur sem einnig hafa látið sig starfsemina að Sólheimum varða. Til að fagna því að laxeldi sé hafið í stöðinni veitti Arnarlax hálfa milljón króna í ferðasjóð fatlaðra íbúa Sólheima.

„Arnarlax er sem áður segir þegar með starfsemi á tveimur öðrum stöðum á Suðurlandi, sem orðið er eitt fremsta fiskeldissveitarfélag landsins en fjölmörg eldisfyrirtæki hafa valið sér stað þar. Starfsemi Arnarlax á Ölfusi fer ört vaxandi og starfa nú 15 manns hjá fyrirtækinu á Suðurlandi,“ segir að lokum.

500 þúsund hrognum hefur verið komið fyrir í húsakynnum Fjallalax. Ljósmynd/Arnarlax

Uppfært 2. febrúar 2022: Upphaflega stóð að Arnarlax hafi fest kaup á stöðinni en rétt er að fest var kaup á rekstrinum. Fréttin hefur verið leiðrétt með tilliti til þessa.

Tengdar fréttir

Fiskeldi

Thor fær leyfi til fiskeldis

• Allt landeldi í uppnámi
• Eining um vöktun grunnvatns
• Tillaga að 12 þúsund tonna eldi Geo Salmo
• Sigurður Arnar til liðs við Laxey

» Fleiri tengdar fréttir

• Blogga um frétt