Gæslan varar við borgarísjaka

Áhöfnin á varðskipinu Þór sigldi fram á myndarlegan borgarísjaka um 20 sjómílur norður af Selskeri á Húnaflóa um hádegisbil í dag. Áhöfn Þórs áætlar að ísjakinn sé um 250 metrar að lengd, 260 metrar að breidd og 15 metra hár.

Frá þessu greinir Landhelgisgæslan í tilkynningu.

Jakinn frá öðru sjónarhorni. Ljósmynd/Landhelgisgæslan

„Eins og sjá má á meðfylgjandi myndunum er jakinn V-laga og líklegt má telja að hann sé strandaður þar sem dýpi á svæðinu er um 80 metrar. Nokkuð óvanalegt er borgarísjakar séu á þessum slóðum á þessum árstíma. Landhelgisgæslan telur ástæðu til að vara sjófarendur við ísjakanum enda getur hann reynst varasamur, sérstaklega í myrkri,“ segir í tilkynningunni.

Jakinn á ratsjármynd Gæslunnar. Ljósmynd/Landhelgisgæslan

Mikilvægt sé að þeir sem eigi leið um svæðið séu meðvitaðir um staðsetningu jakans.

Þegar varðskipið Þór sigldi framhjá jakanum var hann á stað: 66°27,7N – 021°30,0V.

• Blogga um frétt