Alls hafa drepist á bilinu 1,5 til 2 þúsund tonn af laxi í tveimur sjókvíum Acrtic Fish í Dýrafirði það sem af er ári. Það eru um 15 til 20 prósent af lífmassa í kvíunum, sem telja um 10 þúsund tonn af fiski. Fyrirtækið gaf frá sér afkomuviðvörun um helgina þar sem segir að líffræðilegar áskoranir hafi valdið dauða fisksins. Afföllin munu hafa áhrif á afkomu fyrirtækisins á fyrsta ársfjórðungi ársins en betur verður skýrt hvaða áhrif þetta mun hafa á rekstrarárið í kynningu í lok febrúar.

„Þetta eru verulegar tekjur sem við erum að verða af. Þetta var fiskur sem var kominn upp í sláturstærð. Það var búið að leggja út allan kostnaðinn og það átti bara eftir að innheimta tekjurnar,“ segir Daníel Jakobsson í samtali við Morgunblaðið, en hann starfar fyrir Arctic Fish.

Fyrirtækið er í eigu norsku laxeldissamsteypunnar Norwegian Royal Salmon ASA, sem er sjötta stærsta laxeldisfyrirtæki í heimi með heimildir til framleiðslu á 24 þúsund tonnum af laxi á Íslandi. Arctic Fish framleiddi næstmest af laxi á Íslandi á síðasta ári, um 23.400 tonn.

Vont veður og lágur sjávarhiti

Í tilkynningu sem send var út í lok janúar sagði að verið væri að flýta slátrun á fiski til að lágmarka afföllin, en það hefur ekki gengið sem skyldi. Afföllin eru mun meiri en búist var við.

Samspil nokkurra þátta veldur dauða fisksins að sögn Daníels. Þar á meðal er aukið álag á laxinn vegna flutninga á síðasta ári og slæmra veðurskilyrða. Þá er sjávarhiti einnig lágur, eða um ein gráða, og laxinn gjarnari á að fá vetrarsár við þær aðstæður.

Nánar er fjallað um málið í Morgunblaðinu í dag.

Tengdar fréttir

Fiskeldi

721 þúsund seiði drápust

• Felldi niður rannsókn á AF í annað sinn
• Aldrei meira af íslenskum eldisfiski
• Laxey fjárfestir í búnaði frá Marel
• Framleiddu 502 þúsund tonn af laxi

» Fleiri tengdar fréttir